top of page

Azərbaycanda ana arı yetişdirilən təsərrüfatlara subsidiyaların verilməsi təklif edilir


Azərbaycanda ana arı yetişdirilən təsərrüfatlara subsidiyaların verilməsi təklif edilir.

Bunu "Azərbaycan Arıçılar Assosiasiyası" İctimai Birliyinin İdarə Heyətinin sədri Bədrəddin Həsrətov deyib.

Onun sözlərinə görə, 2024-cü ildən etibarən arıçılıq təsərrüfatları olan şəxslərə arı ailələrinin sayına görə dövlət tərəfindən subsidiya verilməyəcək: "Nazirlər Kabinetinin təsdiqlədiyi "Arıçılıqla məşğul olan fiziki və hüquqi şəxslərə saxladıqları hər arı ailəsinə (pətəyə) görə subsidiya verilməsi qaydası"na əsasən, arıçıya hər arı ailəsinə görə illik 10 manat subsidiya verilirdi. Bu subsidiyalar 2019-cu ildən verilir. Subsidiya verilməmişdən əvvəl ökədə 320 min arı ailəsi var idi, hazırda arı ailələrinin sayı təqribən 600 minə çatıb. Ölkədə olan bütün arı ailələri kodlaşdırılıb və Kənd Təsərrüfatı Nazirliyinin Elektron Kənd Təsərrüfatı İnformasiya Sistemində qeydiyyata düşüb. Həm subsidiyanın verilməsi, həm arı ailələrinin qeydiyyata düşməsi bir uğurdur. Lakin Azərbaycanda ana arı yetişdirilməsi və damazlıq işi aşağı səviyyədədir".

B.Həsrətov əlavə edib ki, Azərbaycana külli miqdarda xarici ölkələrdən ana arılar gətirilir: "Rayonlaşdırılmamış arı cinslərinin Azərbaycan ərazisinə gətirilməsinə yalnız elmi-tədqiqat və təcrübə məqsədləri üçün müvafiq icra hakimiyyəti orqanının razılığı ilə müvafiq icra hakimiyyəti orqanı tərəfindən müəyyən edilən qaydada yol verilə bilər. Amma qeyri-qanuni yollarla arılar gətirildiyinə görə xəstəliklərə nəzarət etmək mümkün olmur".

O hesab edir ki, ana arıların ölkədə yetişdirilməsinə diqqət artmalıdı, bu, sahənin inkişafı üçün çox vacibdir: "Azərbaycana ana arılar niyə xaricdən gətirilməlidir? Biz özümüz də bunu yetişdirə bilərik".

Assosiasiya rəhbəri əlavə edib ki, Azərbaycanda arıçılıqla bağlı qanunvericiliyin yenidən işlənilməsinə ehtiyac var: "Hazırda mövcud olan qanun 2009-cu ildə qəbul edilmiş qanundur və burda çoxlu boşluqlar, çatışmazlıqlar var. Bu qanunun yenidən işlənilməsi ilə bağlı təklifi Kənd Təsərrüfatı Nazirliyinə artıq təqdim etmişik".

Comments


bottom of page